MGNREGA சட்டத்தை அமுலாக்கப் போராடிய AIARLA! – தோழர் மதிவாணன்

21 நவம்பர் அன்று காலை மதுரை மாவட்டம், வாடிப்பட்டி ஒன்றிய அலுவலகத்துக்கு முன்பு முன்னறிவிப்பு இல்லாத போராட்டம் நடந்தது. போராட்டத்திற்கு அனைத்திந்திய விவசாய கிராமப்புர தொழிலாளர் சங்கம் –AIARLA- வின் மாநில குழு உறுப்பினர் தோழர் குண்டுமலை தலைமை  வகித்தார். CPI ML கட்சியின் கச்சைகட்டி கிராமக் கிளையின் செயலாளர் தோழர் பம்பையம்மாள் தலைமையில் பெண் தொழிலாளர்கள் போராட்டத்திற்கு திரண்டிருந்தனர். போராட்டம் நடத்துவதாக முதல்நாள் இரவுதான் முடிவு செய்யப்பட்டிருந்தது.

கச்சிக்குட்டி கிராம பெண் தொழிலாளர்கள்

கிராமப்புரத்தில், உடல் உழைப்புத் தரத் தயார் என்று அறிவிக்கும் எந்த ஒருவருக்கும். குறைந்தபட்சம் 100 நாள் வேலையை அவர் கேட்கும்போது கொடுப்பது, குறைந்தபட்ச சட்ட கூலியை வேலை செய்பவருக்கு அளிப்பது என்பதுதான்  2005ல் கொண்டுவரப்பட்ட மகாத்மா காந்தி கிராமப்புர வேலையுறுதிச் சட்டத்தின் நோக்கம். அதாவது, கேட்கும்போது  வேலை கொடுக்க வேண்டும். குறைந்தது 100 நாள் வேலை கொடுக்க வேண்டும். ஆனால், சட்டத்தின் நோக்கத்தை முறியடிக்கும் வகையில் இந்திய அரசு செயல்பட்டு வருகிறது. பல்வேறு நிர்வாக நடைமுறைகளை ஏற்படுத்தி வேலைக்கு வரும் ஆட்களைக் குறைப்பதைச் செய்கிறது. உதாரணமாக, ஒரு  வாரத்தின்  வேலை துவக்க நாளில் (வியாழக்கிழமை) வேலைக்கு வராதவர் அந்த வாரம் முழுவதும் வேலைக்கு வரக் கூடாது என்பது  (சட்ட விரோத) நடைமுறையாக இருக்கிறது. இது குறித்து போராட்டம் நடத்தினால், போராடுபவர்களுக்கு மட்டும் விதிவிலக்குத் தருவார்கள். இதுபோன்ற பல்வேறு முறைகளை அரசு நிர்வாகம் சட்ட விரோதமாகப் பயன்படுத்துகிறது.

இந்த சட்ட விரோத நடைமுறை இப்போது மிகவும் தீவிரமாகிவிட்டது. கச்சைகட்டி கிராமத்தில், கடந்த சில வாரங்களாக,  ஒரு வாரத்திற்கு 50 பேருக்கு மட்டும் வேலை கொடுக்கப்படுகிறது. வேலை கேட்கும் படிவத்தை முதலில் பூர்த்தி செய்து தரும் 50 பேருக்கு மட்டுமே வேலை என்ற புதிய சட்டத்தை அந்த கிராமத்தில் மட்டும் நடைமுறைப்படுத்தியிருக்கிறார்கள். 20, நவம்பர் அன்று கச்சைகட்டி கிராமத்தில் நடைபெற்ற அனைத்திந்திய விவசாய கிராமப்புர தொழிலாளர் சங்கக் கூட்டத்தில் இப்பிரச்சனையை தொழிலாளர்கள் எழுப்பினர். கடந்த 2/3 வாரங்களாகக் வேலை மறுக்கப்பட்டு வந்த தொழிலாளர்கள் மறுநாளே போராட்டம் என்று முடிவெடுத்தனர்.

21 அன்று காலை துவங்கிய போராட்டத்திற்கு ஆதரவு தெரிவித்து தமிழ்நாடு விவசாயத் தொழிலாளர் சங்கத்தின் தோழர் ஜோதி ராமலிங்கமும், CPI கட்சியின் மேற்கு ஒன்றியத் தோழர் பகத்சிங்கும் வந்திருந்தனர். காங்கிரஸ் ஆட்சியின்போது ஏற்பட்ட நெருக்கடியை வாய்ப்பாகப் பயன்படுத்தி மக்கள் நல திட்டமான வேலையுத்திரவாதச் சட்டத்தை நிறைவேற்ற வைத்ததையும் அந்த சட்டத்தைத் திட்டமாகச் சுருக்க மோடி எடுக்கும் முயற்சிகளையும் தோழர் தோழர் ஜோதி ராமலிங்கம் விவரித்தார்.

மோடி ஆட்சிக்கு வந்த உடனேயே ‘காங்கிரஸ் கொண்டுவந்த விரயமான திட்டமான MGNREGAவை முடிவுக்குக் கொண்டுவருவேன்‘ என்று அறிவித்ததையும், அதன் பின்னர் நடைபெற்ற போராட்டங்களின் காரணமாக, ‘காங்கிரஸ் கொண்டுவந்த திட்டம் பயனற்றது என்று மக்களே உணர்ந்து விலகும் வகையில் அதனை நடைமுறைப்படுத்துவேன்‘, என்று பின்வாங்கியதையும் குறிப்பிட்டு தோழர் மதிவாணன் பேசினார். இவர் AIARLவின் மாநில நிர்வாகியாவார். சொன்னதை நிறைவேற்றும் நோக்கில், நிதி ஒதுக்கீட்டைச் சுருக்கியதையும், வங்கி முறையின் மூலம் சம்பளம் வழங்குவதைப் பயன்படுத்தி,  வாரம் ஒரு முறை என்ற சட்டத்திற்கு மாறாக, சில மாதங்களுக்கு ஒரு முறை சம்பளம் என்று  மோடி அரசு ஆக்கியிருப்பதையும் மதிவாணன் விவரித்தார்.

கிராமப்புர மக்களுக்கு அளிக்கப்படும்  வேலையும் அதற்கான கூலியும் இந்திய அரசுக்கு பெரும் சுமையாகத் தெரிகிறது. இத்தனைக்கும் இந்தியா முழுமைக்கும் உள்ள கோடிக் கணக்கான தொழிலாளர்களுக்கு என்று ஆண்டு ஒன்றுக்கு ஒதுக்கப்படுவது 53 ஆயிரம்  கோடிகள் மட்டுமே.

நிர்ப்பந்தங்கள் மூலம் தொழிலாளர்களை வேலையை விட்டு வெளியேற்ற அரசு முயல்கிறது என்று குற்றம்சாட்டிய மதிவாணன், ‘அதுபோன்ற ஒன்றுதான், முதலில் படிவம் அளிக்கும் 50 பேருக்கு மட்டுமே வேலை என்று வட்ட நிர்வாகம் சொல்வது. இந்த சட்டவிரோத நடைமுறையை முறியடிக்க வேண்டும்‘ என்றார்.

ஆர்ப்பாட்டத்திற்குப் பின்பு  அதிகாரிகளைச் சந்தித்தபோது, வேலை கேட்பவர்களுக்கு வேலை அளிக்க வேண்டும் என்பதுதான் சட்டம் என்பதை ஒப்புக்கொண்டனர். ஆனால், விவரமறியாத பணித் தளப் பொறுப்பாளர் தவறாக இதனை அறிவித்திருக்கிறார் என்றார் அதிகாரி. அப்படியானால், அவரை வேலையை விட்டு நீக்குங்கள் என்று  தொழிலாளர்கள் கோபப்பட்டனர்.

தமிழக அரசு மக்கள் நலப் பணியாளர்களை நீக்கிய பின்னர் பணித்தளப் பொறுப்பாளர் என்ற முறை நடைமுறைக்கு வந்தது. MGNRGA பணியாளர்களில் +2 வரை படித்த ஒருவர் பணித் தள நிர்வாகத்தை மேற்கொள்ளுவார். அவருக்கு மட்டும் குறைந்த பட்ச சட்டக் கூலி  முழுமையும் வழங்கப்படுகிறது. போலி அட்டைகள் பராமரிப்பு, அதன் மூலம் வரும் லஞ்சப் பண நிர்வாகத்தையும் அவர்தான் கவனிப்பார். அதிகாரிகள்  வாய்மொழியாக இடும் உத்தரவுகளை அவர் நடைமுறைப்படுத்தினால்தான் வேலை என்ற நிலைமை. அதுபோன்ற பணியாளர் மீது பழியைப் போட்டுவிட்டு அதிகாரிகள் தப்பிக்கப் பார்த்தபோது, தொழிலாளர்கள் எழுப்பிய ‘அந்தப் பெண்ணை வேலையை விட்டு தூக்குங்கள்‘ என்ற கோரிக்கை அதிகாரிகளை மிரள வைத்தது. பின்னர், வரும் வாரம் முதல்  அனைவருக்கும் வேலை உறுதி என்று அதிகாரி உறுதியளித்தார். ஆனால், படிவம் பூர்த்தி செய்ய வேண்டும் என்றார்.

இதுபோன்றதொரு நிகழ்வு மதுரை கிழக்கு ஒன்றிய அலுவலகத்திலும் 22, நவம்பர் அன்று நடைபெற்றது. பொய்கைக்கரைப்பட்டி பஞ்சாயத்துக்கு உட்பட்ட 3 கிராமங்களுக்கு வாரம் ஒரு முறை ஒரு கிராமம் என்று சுழற்சி முறையில் வேலை அளிக்கப்பட்டு சட்டம் மீறப்படுகிறது. பொய்கைக்கரைப்பட்டி கிராமம் CPI ML கட்சி கிளை செயலாளர் தோழர் மல்லிகாவும் சில பெண் தொழிலாளர்களும் சென்று BDOவைச் சந்தித்தனர். மதுரை கிழக்கு ஒன்றிய BDOவும் வாடிப்பட்டி அதிகாரிகள் சொன்ன அதே உறுதிமொழியை அளித்துள்ளார்.

வாடிப்பட்டியும், பொய்கைகரைப் பட்டியும் முல்லை பெரியாறு கால்வாய் பாசனத்தையும், வானம் பார்த்த பூமி விவசாயத்தையும் கொண்டவை. முல்லைப் பெரியாறு பாசனம் சுருங்கி வருகிறது. சென்ற ஆண்டு நெல் விவசாயமே இல்லை. இந்த ஆண்டு பாசனத்திற்கு நீர் அளிக்கப்பட்டாலும், விவசாயிகள் விவசாயத்தை முன்னெடுக்க அஞ்சுகின்றனர்.  வானம் பார்த்த பகுதிகளில் நிலத்தடி நீர் மட்டம் 800 அடிகளுக்குக் கீழே சென்றுவிட்டது. கண்மாய்கள் நிரம்பி பத்தாண்டுகளுக்கு மேலாகின்றன. பொதுவாக, சிறு- குறு நிலவுடமைதான் நிலவுகிறது. எனவே, விவசாயத் தொழிலாளர்களும், சிறு-குறு விவசாயிகளும் வேலைவாய்ப்பின்றி திண்டாடுகின்றனர். பெரும்பாலும் மதுரைக்கு கூலி வேலைகளுக்குச் செல்கின்றனர். அல்லது, கிரமத்தில் கிடைக்கும் சிறு வேலைகளில் ஈடுபட்டு பற்றாக்குறைக்கு இயற்கை அளிக்கும் கொடைகளை (கீரைகள், காடுகளில் கிடைக்கும் விறகு, ஆடு மேய்த்தல் போன்றவற்றைப்) பயன்படுத்தி பற்றாக்குறை வாழ்க்கையில் பட்டினிக் கிடக்கின்றனர். இந்த நிலையில்தான் இந்திய அரசு வேலைக்கு வரும் ஆட்களைக் குறைக்கும் சட்ட விரோத முயற்சியில் ஈடுபட்டு அதில் வெற்றியும் பெற்று வருகிறது.

2005ல் கொண்டுவரப்பட்ட இதற்கான சட்டம் விவசாயத்தின் பின்னடைவையும், கிராமப்புர மக்கள் கிராமங்களிலிருந்து வெளியேறி புலம் பெயர் தொழிலாளர்கள் ஆவதையும், கிராமத்தில் தங்கியிருக்க நேர்ந்த உழைக்கும் பெண்களின் குடும்பச் சுமையைக் குறைத்து, சமூகத்தின் பட்டினிப் பிணையை ஒழிக்கவும் கொண்டுவரப்பட்டது. இந்த நோக்கத்திற்காக, குறைந்த பட்ச ஊதியம் வழங்கப்பட வேண்டும் என்றும், கிராம மக்களின் உழைப்பைப் பயன்படுத்தி, கிராமத்தின் மூலதன வளத்தைப் பெருக்க வேண்டும் என்றும் கூறியது.

ஆனால்,  தற்போதைய அரசு இதனை விரயம் என்று கருதுகிறது. நிதி ஒதுக்க மறுக்கிறது. குறைந்தபட்ச ஊதியம் வழங்கப்படுவதில்லை. என்ன வேலை, எங்கு வேலை போன்ற விஷயங்களை உள்ளூர் கிராமசபை தீர்மானிக்க வேண்டும் என்பதற்கு மாறாக, அதிகாரிகளின் அதிகாரத்தால் நடத்தப்படும் அதிகாரத்துவத் திட்டமாக மாறிவிட்டது.

டிஜிட்டல் முறையில், ஆதார் அட்டையின் மூலம் வங்கியில் கூலி வழங்குவது என்ற முறை மத்திய அரசின் நிதித்துறையின் அதிகாரத்திற்கு கூலி வழங்குவதை மாற்றியுள்ளது. (முன்னர், வாரம் ஒருமுறை நேரடியாக,  மக்கள் வேலை செய்யும் இடத்தில் கூலி வழங்கப்பட்டது.) இதன் காரணமாக, மத்திய அரசின் நிதி நிலையைப் பொறுத்து மத்திய அரசு விரும்பும்போது சம்பளம் வழங்கப்படுகிறது. செய்த வேலைக்கான கூலி, தமிழகம் உள்ளிட்ட 20 மாநிலங்களின் தொழிலாளர்களுக்குச் செப்டம்பர் மாதம் முதல் வழங்கப்படவில்லை என்று 07, நவம்பர் 2017 தி நியூ இந்தியன் எக்ஸ்பிரஸ் எழுதியது. (http://epaper.newindianexpress.com/c/23515708)

இந்தப் பின்னணியில் வேலை பறிப்புக்கு எதிரான கிராம மக்களின் போராட்டம் முக்கியத்துவம் மிக்கதாகிறது. கிராம உழைப்பாளர்கள் மத்தியில் வேலை கோரும் படிவங்களைச் சேகரித்து வேலை கேட்கும் இயக்கத்தை கச்சைகட்டி, பொய்கைக்கரைப்பட்டி AIARLA தோழர்கள் ஓர் இயக்கமாக செய்துவருகின்றனர். வரும் வியாழனன்று வேலை செய்பவர்கள் எண்ணிக்கையைக் குறைக்க முயற்சியெடுத்தால் அதையும் மீறி வெற்றிபெறுவதற்கு செய்ய வேண்டியவற்றைச் செய்ய தீர்மானித்துள்ளனர்.

இதற்கிடையில் CPI, CPI M, CPI ML கட்சிகளின் விவசாயத் தொழிலாளர்கள் சங்கங்கள் ஒன்றிணைந்து மாவட்ட அளவிலான போராட்டம் ஒன்றைக் கட்டமைக்கும் முயற்சியும் நடந்துவருகிறது.

-தோழர் மதிவாணன், AIARLA மாநில நிர்வாகி

 

 

This entry was posted in Informal sector, News, Women Workers, தமிழ் and tagged , , . Bookmark the permalink.